Pele sannar enn einu sinni að hann er skelfilegur spámaður

Knattspyrnugoðið Pele hefur aldrei sýnt fótboltakunnáttu sína utan vallar og nýjast spádómur hans er enn ein sönnun á því. Pele spáði því í sumar að Nígería yrði fyrsta Afríkuþjóðin til þess að komast í undanúrslit á HM þegar keppnin yrði haldin í Suður-Afríku 2010. Nú stefnir hinsvegar allt í það að Nígería komist ekki einu sinni í úrslitakeppnina.

„Með réttum undirbúningi þá kæmi það ekki á óvart ef að Afríkuþjóð klæmist í gegnum átta liða úrslitin og inn í undanúrslitin á HM í Suður-Afríku. Nígería hefur alla burði í það," sagði Pele í júlí síðastliðnum þegar hann heimsótti Nígeríu.

Nígería gerði 2-2 jafntefli við Túnis um helgina og er tveimur stigum á eftir Túnis þegar aðeins tveir leikir eru eftir en aðeins sigurvegari riðilsins kemst áfram. Nígería þarf því að treysta á að Túnis tapi stigum á móti Kenýju og Mósambík á sama tíma og liðið klárar sína leiki.

Brasilíumenn hafa oft gert grín að ummælum Pele. Romario sagði einu sinni að Pele væri ljóðskáld þegar hann opnaði ekki munninn og Luiz Felipe Scolari fór enn lengra.

„Ég held að Pele viti ekkert um fótbolta því spádómar hans rætast aldrei. Ef þú ætlar að vinna titil þá er best að hlusta á ráð Pele og gera síðan alveg öfugt við það sem hann segir," sagði Scolari.