Henry: Leikmenn franska liðsins eru týndir inn á vellinum

Thierry Henry og félagar í franska landsliðinu eiga í hættu að missa af því að komast á HM í Suður-Afríku næsta sumar. Henry hefur komið fram fyrir hönd sinna félaga og kvartað við þjálfarann yfir leiðinlegum æfingum og að leikmenn vita ekki hvað er ætlast til þeirra inn á vellinum.

Franska blaðið Le Parisien hleraði samtal Henry og þjálfarans Raymond Domenech á æfingu. „Þjálfari, við þurfum að segja þér svolítið. Ég tala fyrir hönd alls liðsins," byrjaði Henry.

„Okkur leiðist á æfingunum þínum og á tólf árum með franska landsliðinu hef ég aldrei lent í slíku áður. Við erum týndir inn á vellinum, vitum ekki hvernig við eigum að spila, hvar við eigum að vera eða hvaða skipulag sé í gangi. Við höfum engan leikstíl og engin fyrirmæli. Þetta er ekki að ganga upp," sagði Henry.

Franska knattspyrnusambandið vildi ekki tjá sig um þessi ummæli Henry þegar franska blaðið leitaði eftir því.

Franska landsliðið sækir topplið Serba heim á miðvikudaginn en Sería hefur fjögurra stiga forskot á franska liðið. Það kemur því örugglega í hlut Frakka að þurfa að fara í gegnum umspil til að komast til Suður-Afríku.

Raymond Domenech er búinn að þjálfa franska landsliðið síðan 2004 og undir hans stjórn fór liðið í úrslitaleik HM fyrir þremur árum. Liðið hefur verið á niðurleið síðan þá, datt út úr fyrstu umferð á EM 2008 og hefur síðan átt í miklum vandræðum í undankeppninni.