City ekki tilbúið að gefa Lescott upp á bátinn

Samkvæmt heimildum Sky Sports fréttastofunnar ætla forráðamenn Manchester City að leggja fram nýtt kauptilboð í varnarmanninn Joleon Lescott en Everton hafnaði á dögunum 15 milljón punda kauptilboði í leikmanninn.

City er sagt nálægt því að landa Kolo Toure frá Arsenal á 16 milljónir punda en það mun ekki stoppa City-menn að reyna aftur að fá Lescott.

Lescott kom til Everton á 5 milljónir punda árið 2006 og hefur hægt og bítandi sannað sig sem einn besti varnarmaður ensku úrvalsdeildarinnar.

Alls óvíst er hvort að meiri peningar geti fengið knattspyrnustjórann David Moyes til þess að skipta um skoðun en hann lét hafa eftir sér á dögunum að enginn leikmaður Everton væri til sölu.