Scolari hefur ekkert heyrt frá Chelsea

Luiz Felipe Scolari, landsliðsþjálfari Portúgala, segist ekki hafa heyrt í forráðamönnum Chelsea varðandi knattspyrnustjórastöðuna hjá félaginu. Hann segist einbeita sér að fullu á að undirbúa lið sitt fyrir EM.

"Ég er bara að vinna með portúgalska landsliðið sem stendur. Það er eðlilegt að menn séu forvitnir þegar þjálfari er að klára samning sinn, en ég mun tilkynna forseta okkar niðurstöðuna þegar hún liggur fyrir. Núna hugsa ég bara um EM. Ef forseti portúgalska knattspyrnusambandsins hefði heyrt eitthvað frá forráðamönnum Chelsea, væri hann búinn að segja mér frá því," sagði Scolari í dag.