Dramatískur sigur Everton

Everton vann 3-2 sigur á Stoke á Brittania-leikvanginum í eina leik dagsins í ensku úrvalsdeildinni. David Moyes, stjóri Everton, var sendur upp í stúku í leiknum.

Tim Cahill var í byrjunarliði Everton í fyrsta sinn síðan hann fótbrotnaði í mars síðastliðnum og hélt hann upp á það með því að skora sigurmarkið í leiknum.

Það var þó Yakubu sem skoraði fyrsta mark leiksins á 41. mínútu. Langur bolti kom fram völlinn og náði Marouane Fallaini að skalla boltann niður sem barst á Yakubu. Hann skoraði af mikilli yfirvegun.

Victor Anichebe kom svo Everton tveimur mörkum yfir í upphafi seinni hálfleiks. Mikel Arteta tók aukaspyrnu frá hægri og Anichebe, sem var óvaldaður á nærstönginni, stýrði knettinum í netið með örfínni hreyfingu með hausnum.

En aðeins þremur mínútum síðar náði Stoke að koma sér að blað. Rory Delap tók langt innkast inn á teig sem Tim Howard kýldi í burtu. Boltinn barst beint fyrir fætur Seyi Olofinjana sem dúndraði knettinum í netið.

Á 63. mínútu náði svo heimamenn að jafna metin. Phil Jagielka varð fyrir því óláni að skalla innkast Delap í eigið mark.

Bæði lið reyndu að sækja nokkuð stíft eftir þetta og heimamenn voru ekki ólíklegri að skora næsta mark leiksins frekar en gestirnir.

En það voru leikmenn Everton sem höfðu betur á endanum og geta þakkað Cahill fyrir. Hann skallaði hornspyrnu Arteta í markið frá nærstöng og fagnaði markinu vel og innilega.

Everton er nú í tíunda sæti deildarinnar með sex stig en Stoke í því næstneðsta með þrjú.