Ferguson: Ronaldo er mættur

Sir Alex Ferguson var ekkert of ánægður með lið sitt þó það tæki Stoke í kennslustund 5-0 í dag. Hann hrósaði þó Cristiano Ronaldo fyrir mörkin sín tvö.

Ferguson sagðist ekkert yfir sig hrifinn af því að lið hans hefði slakað full mikið á og misst hraðann eftir að hafa skorað snemma.

Hann fór þó fögrum orðum um portúgalska undrið Cristiano Ronaldo sem þegar er búinn að skora níu mörk á leiktíðinni þrátt fyrir að hafa verið meiddur í byrjun.

"Hann er búinn að skora níu mörk nú þegar og eitthvað segir mér að hann verði ekki lengi í tveggja stafa töluna. Hann er búinn að skora 101 mark í 153 leikjum sem er ótrúleg frammistaða frá vængmanni. Hann mættur aftur - svo mikið er víst. Við erum búnir að bíða eftir því að hann færi að lauma þeim inn úr aukaspyrnum sínum og fyrra markið hans í dag var mjög fallegt," sagði Ferguson í samtali við BBC.