Ferguson gagnrýnir dómara

Sir Alex Ferguson stjóri Manchester United er mjög ósáttur við að rauða spjaldið sem John Terry fékk í leik gegn Manchester City um daginn hafi verið þurrkað út í gær. Það þýðir að Terry verður löglegur með Chelsea gegn United um næstu helgi.

Ferguson sakar Keith Hackett, yfirmann dómaranefndarinnar á Englandi, um að hafa beitt áhrifum sínum á dómara leiksins Mark Halsey sem vísaði Terry af velli.

"Ég hef heyrt að Hackett hafi sagt Halsey að draga spjaldið til baka, en Halsey hafi neitað því - þess vegna sé hann að dæma í fjórðu deildinni um helgina. Ég get ekki skilið hvernig svona getur gerst. Hackett hefði ekki gert þetta ef hér hefði verið að um að ræða leikmann Manchester United," sagði Ferguson.