Ferguson horfir til Santa Cruz

Paragvæski sóknarmaðurinn Roque Santa Cruz hjá Blackburn er orðaður við Englands- og Evrópumeistara Manchester United. Talið er að Sir Alex Ferguson sé að íhuga að gera 15 milljón punda boð í leikmanninn.

Ferguson telur að Santa Cruz smellpassi í United liðið með Cristiano Ronaldo og Wayne Rooney við hlið sér. Þolinmæði hans gagnvart sífelldum meiðslum Louis Saha ku vera á þrotum.

Santa Cruz er 26 ára og fékk mikið hrós fyrir frammistöðu sína hjá Blackburn á nýliðnu tímabili. Hann skorað 23 mörk í 42 leikjum. Hann er góður vinur Owen Hargreaves, miðjumanns Manchester United, en þeir tveir léku saman hjá Bayern München.