Pólskur saksóknari um Plank: Morðingi í klíkustríði

Jan Stawicki saksóknari í Wloclawek Póllandi þekkir vel mál Przemyslaw Plank sem handtekinn var á Íslandi í fyrradag grunaður um morð í heimalandi sínu. Plank er grunaður um að hafa myrt pólska boxarann Andrzej S. Hamel þann 21.mars á síðasta ári.

„Lögreglan fann lík í nágrenni Wikaryjskie árinnar og á því voru nokkrir áverkar. Morðingjarnir voru fleiri en einn og þeir notuðu líklega sveðjur," segir Jan Stawicki saksóknari í samtali við Vísi.

Plank sem kallaður er Plankton er talinn vera einn af þeim sem myrtu boxarann að sögn Stawicki en svo virðist sem um nokkurskonar klíkustríð hafi verið að ræða.

„Przemysław Plank var hluti af Niedzóla genginu en Andrzej S. Hamel var meðlimur í gengi sem barðist við gengi Planktons um yfirráð í bænum," segir Stawicki þegar hann útskýrir ástæður morðsins.

Aðspurður um hversvegna hann haldi að Plankton hafi komið til Íslands segist hann ekki vita það beint en grunar að það hafi verið til þess að flýja umræðuna í Póllandi.

„Þegar hann fór til Íslands lágu fyrir þónokkrar upplýsingar um Hamel morðið og Niedzóla klíkuna. Það var mikið fjallað um þetta í blöðunum hérna en í upphafi rannsóknarinnar var Plankton aðeins vitni í málinu. Síðar var hann grunaður um morðið en þá flúði hann frá Póllandi."

Plankton hefur haldið því fram m.a í íslenskum fjölmiðlum að hann hafi fjarvistarsönnun og gaf sig meðal annars fram eftir að umfjöllun um hann hófst hér á landi. Stawicki segist ekki vita til þess að Plankton hafi fjarvistarsönnun.

„En þetta er vissulega áhugaverður punktur fyrir okkur. Það eina sem ég get sagt er að við höfum mjög góð sönnunargögn gegn honum."

Stawicki segist ekki halda að fleiri meðlimir Niedzóla klíkunnar dvelji á Íslandi.