McClaren er Króatíusérfræðingur BCC

Steve McClaren, fyrrum landsliðsþjálfari Englendinga, verður sérfræðingur BBC á EM í knattspyrnu. Í frétt um málið í Daily Mail í dag er bent á kaldhæðnina á bak við það að McClaren verði fenginn til að vera "sérfræðingur" opnunarleik Króata á sunnudaginn.

McClaren á auðvitað ekki sérstaklega góðar minningar frá viðureignum sínum við Króata, því enska landsliðið tapaði báðum leikjum sínum gegn Króötum í undankeppni EM og það var mikið til þess vegna sem enska landsliðið komst ekki í úrslitakeppnina.

Einn af stuðningsmönnum enska landsliðsins veitti þessu athygli í viðtali við Daily Mirror og segja má að hann hafi hitt naglann á höfuðið.

"Það er súrt að við sem þurfum að sitja heima og horfa á þetta í sjónvarpinu, séum að borga fyrir McClaren á EM með því að greiða áskriftargjöldin. Við erum að borga undir svokallaðan sérfræðing og það má til sanns vegar færa að hann sé sérfræðingur - hann tapaði nú tvisvar fyrir Króötum!"