Ronaldinho skoraði tvö og Brasilía komst áfram

Ronaldinho skoraði tvö marka Brasilíu í 5-0 sigri liðsins á Nýja-Sjálandi. Bæði Brasilía og Argentína eru búin að tryggja sér sæti í fjórðungsúrslitum keppninnar.

Í A-riðli vann Argentína 1-0 sigur á Ástralíu með marki Ezequiel Lavezzi á 76. mínútu og er liðið því með fullt hús stiga, rétt eins og Brasilía í C-riðli.

Anderson kom Brössunum yfir strax á þriðju mínútu og Pato skoraði annað markið á 33. mínútu. Þá var komið að Ronaldinho sem skoraði á 54. og 61. mínútu, það síðara úr víti. Sóbis innsiglaði sigurinn með marki í uppbótartíma.

Nígería vann svo Japan, 2-1, í B-riðli. Obinna og Anichebe skoruðu mörk Nígeríu og Toyoda mark Japan.

Bandaríkin getur tryggt sér sæti í fjórðungsúrslitunum með sigri á Hollandi en seinni viðureignir dagsins eru nú í gangi.