Castro bauð Vigdísi og Brundtland í sumarfrí á Kúbu

Frú Vigdís Finnbogadóttir, fyrrverandi forseti Íslands, ber Fidel Castro vel söguna af stuttri viðkynningu sem hún hafði af honum á umhverfisráðstefnunni í Rio de Janeiro í Brasilíu árið 1992. Castro bauð henni og Gro Harlem Brundtland, þáverandi forsætisráðherra Noregs, í sumarfrí á Kúbu í framhaldi af samtali þeirra.

„Hann mætti þarna galvaskur og afar hress og flutti mikla ræðu og langa," segir frú Vigdís um Castro en þau tóku bæði til máls á ráðstefnunni sem þykir hafa markað tímamót í viðhorfum til umhverfismála. „Hann var ákaflega vinsæll í Brasilíu á þessum tíma og fyrir utan hótelið sem við bjuggum bæði á beið alltaf fjöldi fólks eftir honum," segir frú Vigdís.

Eftir að frú Vigdís og Castro höfðu bæði lokið máli sínu gaf Castro sig á tal við hana og Gro Harlem Brundtland. „Hann var glaðhlakkalegur við okkur Gro og bauð okkur að heimsækja sig í sumarfrí á eyju sam hann hafði til ráðstöfunar. Honum fannst það tilkomumikið að við værum forystumenn meðal þjóða okkar og sagðist vilja hag kvenna sem mestan á Kúbu," segir frú Vigdís. Aðspurð segist hún þó ekki hafa þegið boðið.

Frú Vigdís segir aðspurð að gaman hafi verið spjalla við Castro, hann hafi vitað upp á hár um sinn styrk. „Hann hafði gríðarlega útgeislun og maður skilur að slíkir menn eigi það til að ná tökum á fólki, fólk heillaðist mjög af honum," segir frú Vigdís.

Þetta eru þó ekki einu kynni frú Vigdísar af forsetanum aldna því þegar hún var leikhússtjóri Leikfélags Reykjavíkur bárust henni árnaðaróskir frá leiðtoganum um hver áramót. Aðspurð segist frú Vigdís ekki hafa hugmynd um það af hverju hann tók upp á því að senda henni nýárskort. „Þetta voru stuttorð kort með óskum um gleðileg jól og farsælt nýtt ár og svo fylgdi alltaf setningin „This is my brother" og mynd af bróður hans Raúl," segir frú Vigdís.