Vona að Benitez hvíli 10 menn

Harry Redknapp stjóri Tottenham segist vona að kollegi hans Rafa Benitez hjá Liverpool tefli fram veikara liði í viðureign liðanna í deildabikarnum í kvöld en hann gerði í deildarleik liðanna á White Hart Lane í deildinni á dögunum.

Tottenham vann þann leik reyndar 2-1 með tveimur mörkum í blálokin, en Liverpool var mun sterkari aðilinn í þeim leik. Redknapp er ekki búinn að gleyma því ef marka má viðtal við hann í Sun í dag.

"Ég kvíði því hvað gerist ef þeir spila eins og þeir spiluðu gegn okkur í deildinni um daginn. Þeir voru frábærir og slátruðu okkur ef ég á að vera hreinskilinn. Við stálum sigrinum með tveimur mörkum í lokin en þeir hefðu geta verið búnir að gjörsigra okkur fyrir það. Þeir voru í öðrum gæðaflokki en við í þessum leik og ég vona bara að Rafa hvíli 10 menn fyrir bikarleikinn," sagði Redknapp.

Benitez hefur þegar gefið út að hann muni hvíla þá Robbie Keane og Steven Gerrard, en búist er við því að Fernando Torres verði í framlínu þeirra rauðu.

Leikurinn í kvöld verður sýndur beint klukkan 19:40 á Stöð 2 Sport.