Maradona: Skotarnir elska mig

Diego Maradona, nýráðinn landsliðsþjálfari Argentínu, stýrir liðinu í fyrsta skipti í æfingaleik gegn Skotum. Hann segir þarlenda elska sig af því hann hafi á sínum tíma gert Englendingum lífið leitt á knattspyrnuvellinum.

"Þeir elska mig í Skotlandi," sagði Maradona í samtali við Sky Sport á Ítalíu. "Ég er að fara til lands þar sem þeir elska mig vegna markanna sem ég skoraði gegn Englendingum á HM árið 1986," sagði knattspyrnugoðið og lýsti því yfir að hann ætlaði með sitt sterkasta lið til Glasgow.

Hann er nú á ferð um Evrópu til að fylgjast með landsliðsmönnum sínum spila félagsliðum sínum víðsvegar um álfuna.