Undanúrslit Afríkueppninnar í dag

Í dag fara fram undanúrslitaviðureignirnar í Afríkueppninni en leikirnir verða í beinni útsendingu á Eurosport.

Heimamenn í Gana mæta Kamerún klukkan 17.00 og kl. 20.30 mætast Afríkumeistarar Egyptalands liði Fílabeinsstrandarinnar.

Egyptaland og Fílabeinsströndin mættust í úrslitaleik keppninnar fyrir tveimur árum þegar hún var haldin í Egyptlandi. Þá þurfti vítaspyrnukeppni til að knýja fram úrslit.

Michael Essien verður fyrirliði Gana í fjarveru John Mensah sem missir af leiknum í dag þar sem hann mun taka út leikbann. Þetta hefur einnig mikil áhrif á varnarleik liðsins en í sókn Kamerún er hinn stórhættulegi Samuel Eto'o.

Claude Le Roy, þjálfari Gana, hefur gefið í skyn að hann kunni að nota Essien í stöðu miðvarðar til að hafa hemil á Eto'o. Essien hefur hins vegar spilað á miðjunni til þess og skorað tvö mörk í síðustu tveimur leikjum.

Þá er sóknarmaðurinn Asamoah Gyan tæpur vegna meiðsla og er því ljóst að það verður á brattann að sækja hjá heimamönnum.

Kamerúnar voru afskrifaðir á mótinu eftir að þeir töpuðu 4-2 fyrir Egyptum í fyrstu umferð riðlakeppninnar. Síðan þá hafa þeir skorað ellefu mörk í þremur leikjum en liðið vann Túnis í framlengdum leik í fjórðungsúrslitum.

Bæði lið hafa fjórum sinnum unnið þessa keppni en Egyptar hafa oftast unnið, fimm sinnum.

Egyptar þurfa þó að leggja sterkt lið Fílabeinsstrandarinnar af velli til þess að eiga möguleika á þeim sjötta. Síðarnefnda liðið hefur vitanlega ekki gleymt úrslitaleiknum fyrir tveimur árum og vilja sjálfsagt hefna þeirra úrslita.

Búist er við því að Kolo Toure verði klár í slaginn en hann missti af leik Fílabeinsstrandarinnar í fjórðungsúrslitum er liðið vann sigur á Gíneu, 5-0.

Egyptar eru enn taplausir á mótinu en þeir unnu nauman sigur á Angóla í fjórðungsúrslitum, 2-1. Það er þó áhyggjuefni fyrir þá að sóknarmaðurinn Mohamed Zidan er tæpur vegna meiðsla en hann skoraði tvívegis í sigri þeirra á Kamerún.

Fílabeinsströndin hefur unnið alla sína leiki á mótinu en deilan í kringum Didier Drogba og kjör knattspyrnumanns ársins í Afríku kann að hafa ófyrirséð áhrif á liðið í dag.

Starfsmenn og leikmenn liðsins neituðu að tjá sig við fjölmiðla á þriðjudaginn.