Samningur XL og West Ham enn í gildi

Þó svo að XL Leisure Group hafi verið tekið til gjaldþrotaskipta er samningur þess við West Ham enn í gildi.

Fréttir af gjaldþroti XL hafa víða áhrif en í febrúar síðastliðnum gerði West Ham eins árs samning við fyrirtækið um að gerast aðalstyrktaraðili þess. XL hefur síðan þá auglýst á búningi félagsins.

Samningurinn var svo framlengdur í sumar en samkvæmt heimildum Vísis úr herbúðum West Ham stóð XL við sínar skuldbindingar og greiddi samkvæmt samningnum á síðasta rekstrarári.

Engu að síður er ljóst að félagið muni þurfa að þola fjárhagslegst tjón vegna samningsins á þessu ári. Ef allt fer á versta veg verði félagið af um 320 milljónum króna í tekjur, um tvær milljónir punda, en heildartekjur West Ham eru um 16 milljarðar króna á ári.

Búist er við því að West Ham sendi frá sér yfirlýsingu síðar í dag vegna málsins. Það er skiptastjóri þrotabúsins sem þarf að gefa West Ham skýr skilaboð en þar til hann segir annað er samningurinn enn í gildi.

Það væri West Ham best í hag ef þrotabúið yrði seldum öðrum aðila sem tæki yfir samninginn. Eða þá að samningnum yrði rift svo félagið gæti fundið sér nýjan styrktaraðila.