Zola tekur við West Ham

West Ham hefur ráðið Gianfranco Zola sem knattspyrnustjóra liðsins til næstu þriggja ára. Félagið er í eigu Björgólfs Guðmundssonar.

Val West Ham stóð á endanum á milli þeirra Roberto Donadoni, John Collins og Zola en sá síðastnefndi var fyrsti kostur West Ham.

Hann var um árabil leikmaður Chelsea og er einn vinsælasti leikmaður liðsins frá upphafi. Hann var síðast annar aðalþjálfara ítalska U-21 landsliðsins sem lék sinn síðasta leik í undankeppni EM 2009 í gær.

Vísir hefur heimildir fyrir því að Zola muni reyna að fá Steve Clarke, fyrrum félaga sinn hjá Chelsea og núverandi aðstoðarþjálfara félagsins, til liðs með sér til West Ham.