Arsenal og Man Utd áfram í deildabikarnum

Arsenal og Manchester United komust bæði áfram í enska deildabikarnum í kvöld. Arsenal vann öruggan 3-0 sigur á Wigan á meðan Manchester United vann QPR á Old Trafford 1-0.

Arsene Wenger gerði 11 breytingar á byrjunarliði sínu frá sigrinum gegn Manchester United um síðustu helgi. Hann tefldi fram ansi ungu liði en sá yngsti var Jack Wilshere, sextán ára strákur, sem átti frábæran leik.

Wilshere lagði einmitt upp fyrsta mark leiksins fyrir Jay Simpson undir lok fyrri hálfleiks. Chris Kirkland, markvörður Wigan, kom í veg fyrir að forysta Arsenal væri stærri í hálfleik.

Simpson, sem er 19 ára, skoraði aftur á 67. mínútu eftir undirbúning Carlos Vela. Vela skoraði sjálfur þriðja og síðasta markið með laglegum hætti.

Carlos Tevez skoraði mark Manchester United gegn QPR en það kom úr vítaspyrnu á 76. mínútu. Önnur úrslit kvöldsins voru þau að Derby vann Leeds 2-1, Stoke vann Rotherham 2-0 og Watford vann 1-0 útisigur á Swansea.