Vítaspyrnukeppni þarf ef Tékkland og Tyrkland skilja jöfn

Sú staða gæti vel komið upp að vítaspyrnukeppni þurfi til að skera úr um hvort að Tyrkland eða Tékkland fari áfram í fjórðungsúrslit EM 2008 ef liðin skilja jöfn í lokaumferð riðlakeppninnar.

Bæði lið eru með nákvæmlega jafn góðan árangur eftir fyrstu tvær umferðir riðlakeppninnar og mætast svo í lokaumferðinni. Ef jafntefli verður niðurstaðan í þeim leik segja reglur Knattspyrnusambands Evrópu um keppnina að vítaspyrnukeppni þurfi til að skera úr um hvort liðið fari áfram. Reglugerðina má finna hér undir lið 7.08.

Leikurinn verður þó ekki framlengdur heldur farið beint í vítaspyrnukeppnina að leiknum loknum. 

Portúgal hefur þegar tryggt sér sæti í fjórðungsúrslitunum og Sviss getur ekki náð upp í annað sæti riðilsins. Það verða því annað hvort Tékkar eða Tyrkir sem fylgja Portúgölum í næstu umferð keppninnar.