Óvinsældir Davíðs endurspegla óvinsældir Seðlabankans

,,Það er sérstaklega sláandi hversu lítið traust sjálfstæðismenn bera til Davíðs. Ég held að þjóðin líti svo á að hann sitji þarna í skjóli Sjálfstæðisflokksins," segir Einar Mar Þórðarson stjórnmálafræðingur um skoðanakönnun sem birtist í fréttum Stöðvar 2 í kvöld.

Könnunin sýndi að 90% þjóðarinnar treysta ekki Davíð í stóli seðlabankastjóra. Jafnframt sýndi hún að ríflega 80% sjálfstæðismanna styðja ekki veru hans í Seðlabankanum.

Einar segir að Davíð sé mörgu leyti andlit Seðlabankans og að þjóðin þekki hann frá fornu fari. Könnunin endurspegli því vantraust almennings til bankans.

Þá bendir Einar á að könnunin hafi verið framkvæmd áður en tilkynnt var um stýrivaxtahækkunina í dag.

,,Ég held að þeir fáu sem eftir voru sem höfðu trú á Davíð og bankanum hljóti að hafa misst hana í dag þar sem það eru ekki nema tíu dagar síðan vextir voru lækkaðir. Ég held að margir fái það á tilfinninguna að menn viti ekki alveg hvað þeir eru að gera," segir Einar.

Óvinsældir Davíðs munu koma niður á Sjálfstæðisflokknum í skoðanakönnunum, að mati Einars. ,,Við getum orðað það þannig að Davíð er ekki að hjálpa flokknum á meðan hann situr í þessu embætti."