Beckham fyrirliði á ný

David Beckham verður fyrirliði enska landsliðsins á nýjan leik er það mætir Trinídad og Tóbagó í vináttulandsleik á morgun.

Beckham var lengi fyrirliði enska landsliðsins en lét af því hlutverki eftir HM 2006. Hann var síðan ekki valinn í landsliðið lengi vel af þáverandi landsliðsþjálfara, Steve McClaren, en hefur síðan þá unnið sér sæti í landsliðinu aftur og fær nú fyrirliðabandið á nýjan leik.

Fabio Capello, landsliðsþjálfari, hefur skipt fyriliðahlutverkinu á milli leikmanna síðan hann tók við en hann mun útnefna framtíðarfyrirliða þegar undankeppni HM 2010 hefst í haust. Rio Ferdinand, Steven Gerrard og John Terry hafa áður gegnt fyrirliðahlutverkinu undir stjórn Capello.

Þetta verður 59. landsleikur Beckham sem fyrirliði enska landsliðsins.