Voru mennirnir sem Eriksson keypti að standa sig?

Sven-Göran Eriksson keypti alls tíu leikmenn í stuttri stjórnartíð sinni hjá Manchester City. Hér má sjá hvaða leikmenn það voru og hvort þeir stóðu undir væntingum?

Rolando Bianchi - Nei

Eriksson setti það sem forgangsatriði að fá sóknarmann til liðsins og keypti Bianchi frá Reggina á 8,8 milljónir punda. Hann hafði skorað 18 mörk í ítalska boltanum tímabilið á undan og skoraði í sínum fyrsta leik fyrir City.

Hann náði alls ekki að fylgja eftir þeirri byrjun og skoraði næsta mark sitt ekki fyrr en fjórum mánuðum síðar. Hann missti sætið í byrjunarliðinu og var á endanum lánaður til Lazio í heimalandinu.

Geovanni - Nei

Geovanni hafði flotta ferilskrá áður en Eriksson fékk hann til City. Líkt og Bianchi lofaði hann mjög góðu í byrjun tímabilsins. Skoraði í fyrsta leik og menn spáðu honum hetjustimpli eftir að hann tryggði City sigur á erkifjendunum í Manchester United. En eftir það mark lá leiðin aðeins niður og hann olli miklum vonbrigðum.

Elano - Frekar já en nei

Í byrjun tímabils spilaði City blússandi sóknarbolta og Elano var hjartað í leik liðsins. Menn trúðu að hann væri leikmaður sem gæti hjálpað City að komast í hóp fjögurra efstu í deildinni. En eins og hjá mörgum öðrum leikmönnum City dalaði hann seinni hlutann. Breyting á leikskipulagi hafði sín áhrif.

Hann viðurkenndi að erfiðir vellirnir yfir háveturinn væru að gera honum erfitt fyrir. Stóð sig þó ágætlega í heildina og sýndi fjölhæfni sína þegar hann brá sér í hægri bakvörðinn til að hjálpa City í varnarvandræðum sínum.

Gelson Fernandes - Já

Þessi ungi svissneski miðjumaður lék bæði á miðju og í vörn á tímabilinu. Þessi 22 ára leikmaður er þegar orðinn fastamaður í landsliði sínu og gæti orðið frábær úrvalsdeildarleikmaður. Virkilega vinnusamur og stóð sig mjög vel á fyrsta tímabili hjá City.

Martin Petrov - Já

Virkilega hæfileikaríkur vængmaður sem keyptur var frá Atletico Madrid. Les leikinn vel og er með frábærar sendingar. Sýndi líka að hann er góður að nýta færin sín. Skilaði lítilli varnarvinnu en átti samt sem áður fast sæti í liðinu.

Javier Garrido - Já (rétt svo)

Garrido átti eins og Manchester City tímabil sem skipta má í tvo kafla. Hann kostaði þó frekar lítið og og er nokkuð ungur að árum svo hann verður að fá tíma til að aðlagast enska boltanum.

Vedran Corluka - Já

Króatinn Corluka á framtíðina fyrir sér. Lofaði góðu sem miðvörður og var frábær sem hægri bakvörður. Traustur leikmaður sem á sjaldan afburða-leiki en gerir fá mistök. Hann leggur ekki upp mörk og skorar ekki en hann kann að tækla!

Valeri Bojinov - Ekki hægt að dæma

Sóknarmaðurinn Bojinov gat ekki sýnt stuðningsmönnum City hvað í sér býr vegna meiðsla. Mun vonandi geta sýnt það á næsta tímabili.

Felipe Caicedo - Já og nei

Nítján ára sóknarmaður frá Ekvador sem var fenginn með framtíðina í huga. Kom af bekknum og sýndi ágæt tilþrif á köflum.

Benjani - Já (rétt svo)

Byrjaði rólega hjá City en komst í uppáhald hjá stuðningsmönnum með því að skora gegn Manchester United. Mörk í síðustu tveimur leikjunum sýna að hann er farinn að finna sig. Hefur sannað sig sem markaskorari í úrvalsdeildinni.

Heimild: BBC