Keegan er hættur

Kevin Keegan hefur nú formlega sagt starfi sínu lausu sem knattspyrnustjóri Newcastle.

Hann var sagður hafa hætt fyrr í vikunni en stjórn félagsins neitaði þeim fregnum. Nú hefur hann hins vegar sent út yfirlýsingu og tekið af allan vafa um málið.

„Ég hef unnið hörðum höndum að því að reyna að finna leið til að starfa áfram en það reyndist ekki mögulegt," sagði Keegan.

„Það er mín skoðun að knattspyrnustjórinn verði að fá að ráða yfir málefnum liðsins. Félögin eiga ekki að ýta leikmönnum inn sem stjórinn vill ekki fá."

Hann var aðeins við stjórnvölinn í sjö mánuði en þetta var í annað sinn á ferlinum sem hann stýrir liði Newcastle.

Talið er líklegt að samband hans við Mike Ashley, eiganda Newcastle, hafi verið slæmt þar sem þeir hafi verið ósammála um málefni Joey Barton hjá félaginu sem og fleiri leikmenn, svo sem Michael Owen. Ekkert hefur þó fengist staðfest í þeim efnum.