Ingibjörg skrifaði ekki bréf til breskra þingmanna

Vísir sagði frá því í morgun að breska blaðið Independent fullyrði að Ingibjörg Sólrún Gísladóttir utanríkisráðherra hafi skrifað breskum þingmönum bréf þar sem hún fordæmir notkun þarlendra stjórnvalda á hryðjuverkalögum til að frysta eignir íslenskra banka. Samkvæmt upplýsingum frá Urði Gunnarsdóttur upplýsingafulltrúa Utanríkisráðuneytisins skrifaði Ingibjörg hinsvegar ekkert bréf.

Um er að ræða ávarp sem sendiherra Íslands í Bretlandi hélt fyrir hennar hönd í hópi nokkurra breskra þingmanna.

Þingmönnum bauðst afrit af ávarpinu og telur Urður að misskilningurinn sé þaðan kominn.