Hull og Manchester City skildu jöfn

Mikið var í húfi í leik Hull og Manchester City í síðari leik dagsins í ensku úrvalsdeildinni þar sem bæði lið höfðu tapað þremur leikjum í röð í deildinni.

Svo fór að lokum að liðin skildu jöfn 2-2 í fjörugum leik í Hull, en það var hinn ótrúlegi Geovanni sem tryggði heimamönnum jafnteflið með marki beint úr aukaspyrnu - hans sjötta mark í deildinni.

Daniel Cousin kom Hull yfir þegar hann nýtti sér mistök Tal Ben-Haim á 14. mínútu leiksins en tvö mörk frá Stephen Ireland rétt fyrir hlé komu gestunum yfir 2-1.

Bæði lið þurftu nauðsyhlega á sigri að halda í dag eftir slakan árangur að undanförnu, en líklega hefur Mark Hughes stjóri Manchester City verið hvað svekktastur yfir því að ná ekki í þrjú stig í dag.

City er í 12. sæti deildarinnar eftir leiki dagsins, en er þó ekki nema þremur stigum á undan botnliði West Brom. Hull er í sjötta sæti deildarinnar með 21 stig.