Ólafur dæmir á nýjan leik

Ólafur Ragnarsson mun dæma leik Breiðabliks og FH í sjöundu umferð Landsbankadeildar karla. Ólafur hefur dæmt einn leik í sumar, viðureign Keflavíkur og ÍA í fjórðu umferð og var hann harkalega gagnrýndur fyrir frammistöðu sína af Guðjóni Þórðarsyni, þjálfara ÍA.

Guðjón gaf til kynna í viðtali við Stöð 2 Sport eftir leikinn að Ólafur væri ekki í nægilega góðu líkamlegu formi til að takast á við verkefnið. Hann sakaði hann um að beita Stefán Þórðarson, leikmann ÍA, ofbeldi með því að gefa honum rauða spjaldið í leiknum.

Þetta var fyrsti leikur Ólafs í sumar þar sem hann var meiddur í upphafi móts. Hann hefur hins vegar ekkert dæmt í deildinni síðan þá, þar til nú.

Leikur Breiðabliks og FH fer fram mánudaginn næstkomandi og verður í beinni útsendingu á Stöð 2 Sporti.