Newcastle hefur áhuga á Riise

Joe Kinnear, stjóri Newcastle, hefur staðfest að félagið sett sig í samband við Roma á Ítalíu með það fyrir augum að fá John Arne Riise til félagsins.

Kinnear er nú með alla anga úti fyrir félagaskiptagluggann sem opnar um áramótin. Hann bindur þó litlar vonir við að fá Riise á láni frá Roma.

„Nafn John bar á góma þar sem hann var ekki búinn að spila mikið með sínu liði. Við settum okkur samband við Roma og spurðum hvaða möguleikar væru á því að fá hann lánaðan í janúar."

„Síðan þá hefur John unnið sér sæti í liði Roma og hefur verið að spila vel. Ég geri ráð fyrir því að það breyti ýmislegu."

Kinnear getur þó glaðst yfir því að Mark Viduka er byrjaður að æfa á nýjan leik og gæti vel orðið leikfæri fyrir leik Newcastle gegn Middlesbrough um helgina. Viduka hefur ekkert getað spilað með félaginu á núverandi tímabili vegna meiðsla.