Opnar svefnherbergið á aldarafmælinu

Hafnfirðingar fagna 100 ára afmæli bæjar síns með margvíslegum hætti þessa dagana undir heitinu Heimboð í Hafnarfjörð. Liður í afmælishaldinu er þegar hafnfirskir listamenn opna vinnustofur sínar fyrir gestum og gangandi milli klukkan 18 og 22 í kvöld. Verkin eru að öllum líkindum af margvíslegum toga og vinnustofurnar eins mismunandi og gengur og gerist.

Fáir verða þó á jafnpersónulegum nótum og myndlistarkonan Ólöf Björg Björnsdóttir en hún hefur fært listvinnustofu sína inn í hin helgustu vé - sitt eigið svefnherbergi. „Vinnustofan mín var í stofunni en svo fæddist þessi hugmynd," útskýrir Ólöf. „Listagyðjan þurfti bara meira pláss. Rúmið fór þess vegna inn í stofu og svefnherbergið er vinnustofa og aldrei að vita nema það verði að galleríi í fyllingu tímans," segir hún og bætir því við að persónulegt andrúmsloft svefnherbergisins lyfti sköpunargáfu hennar í hæstu hæðir.

Dansar með penslana

„Ég er mjög einlæg í minni myndlistarvinnu og nota gjarnan blandaða tækni, oft málverk eða ljósmyndir ásamt öðrum hlutum. Svo tala ég við mismunandi skynfæri, t.d. með því að nota lykt, t.d. hreingerningarlykt eða kryddlykt," segir Ólöf enn fremur. Hún segir listsköpun sína vera mjög líkamlega og reyni hún iðulega að skapa ákveðna stemmningu þegar hún málar, t.d. með því að hafa ákveðinn ilm í herberginu, kertaljós eða tónlist „og oft dansa ég þegar ég er að mála. Það verður meiri einlægni í verkunum og sérstaklega ef maður notar svefnherbergið þar sem maður fær oft góðar hugmyndir milli svefns og vöku, mann dreymir þarna og svo framvegis," segir Ólöf.

Ólöfu þykir að eigin sögn mjög vænt um Hafnarfjörð þar sem hún hefur lengi búið og margir í hennar fjölskyldu langt aftur í aldir. Hyggst hún því bjóða verk sín til sölu á sýningunni í kvöld á sérstöku verði: „Ég veit af fólki sem er hrifið af verkum mínum og langar að kaupa þau svo þetta er mjög góður tíma til að koma og fá þau á afmælisverði. Svo er aldrei að vita nema ég leyfi fólki að prófa að mála," segir Ólöf að lokum og klykkir út með því að hún framlengi jafnvel sýninguna um einhverja daga verði mæting og stemmning góð í kvöld. Ólöf er búsett að Engjahlíð 5 í Hafnarfirði.