Liverpool á toppinn

Liverpool smellti sér á toppinn í ensku úrvalsdeildinni með 2-0 sigri á Bolton á Reebok vellinum í fyrsta leik dagsins á Englandi. Dirk Kuyt og Steven Gerrard trygðu liðinu verðskuldaðan sigur með marki í sitt hvorum hálfleiknum.

Hollendingurinn Kuyt kom Liverpool yfir eftir um hálftíma leik þegar hann skallaði fyrirgjöf Fabio Aurelio í netið. Mark var dæmt af Bolton um miðbik leiksins og var liðið mun sprækara í síðari hálfleiknum.

Sóknir heimamanna skiluðu þó ekki tilætluðum árangri og Steven Gerrard skallaði fyrirgjöf Fernando Torres í netið á 73. mínútu. Undirbúningur Spánverjans var frábær og tryggði markið Liverpool sigurinn.

Liðið hefur nú 32 stig á toppnum, þremur meira en Chelsea sem hefur 29 og á leik til góða gegn WBA á útivelli í dag klukkan 17:30.

Sex leikir hefjast svo nú klukkan 15:00:

Arsenal-Aston Villa

Blackburn-Sunderland

Fulham-Tottenham

Man.Utd.-Stoke

Newcastle-Wigan

West Ham-Portsmouth