Vekja athygli vestra

Lagið Really Wild af nýjustu plötu JJ Soul Band, Bright Lights, var á dögunum tilnefnt til Hollywood Music-verðlaunanna. Lagið náði þó ekki að bera sigur úr býtum þegar verðlaunin voru afhent í síðasta mánuði.

Áður hafði lagið Getting Colder By the Year af sömu plötu hlotið tilnefningu til Los Angeles Music-verðlaunanna fyrir ári síðan. Lagið That Kinda Man með JJ Soul Band komst jafnframt í úrslit í 100% Music Songwriting-keppninni fyrr á árinu.

Í þeirri keppni hlaut einnig lag Ingva Þórs Kormákssonar úr JJ Soul Band og Friðriks Erlingssonar, Tonight My Love, fyrstu verðlaun í funk/latin/reggae/world-flokki og líka þriðju verðlaun í allri keppninni óháð tegund tónlistar. Það er Guðrún Gunnars sem syngur enska útgáfu lagsins en Eivör Pálsdóttir söng íslensku útgáfuna í Söngvakeppni Sjónvarpsins árið 2003.

Meðlimir JJ Soul Band eru, auk Ingva Þórs, breski söngvarinn og lagahöfundurinn JJ Soul, Eðvarð Lárusson gítarleikari, Stefán Ingólfsson sem leikur á bassa, trommuleikarinn Steingrímur Óli Sigurðarson og Agnar Már Magnússon á hljómborð.- fb