Gerrard vill ólmur fá Barry

Steven Gerrard, fyrirliði Liverpool, segist ólmur vilja fá landsliðsfélaga sinn Gareth Barry til félagsins frá Aston Villa í sumar.

Barry hefur lengi verið orðaður við þá rauðu, en Aston Villa hefur hingað til neitað kauptilboðum Liverpool í kappann - sem talin eru vera í kring um 10 milljónir punda.

Barry hefur þótt leika mjög vel bæði með Villa og enska landsliðinu á undanförnum misserum og Gerrard vill ólmur fá góðan vin sinn til þeirra rauðu.

"Ég þekki Gareth mjög vel og við erum vinir innan sem utan vallar. Ég óska þess því heitt að við náum að fá hann, því hann er líka leikmaður sem getur bætt lið okkar mikið," sagði Gerrard.

"Við megum hinsvegar ekki sýna Aston Villa óvirðingu, því hann er enn samningsbundinn þar. Þeir vilja auðvitað halda í hann og ég skil það vel, en ég vil ólmur fá hann til Liverpool," sagði Gerrard í samtali við Sky.