Vidic tæpur fyrir Chelsea-leikinn

Alex Ferguson, stjóri Manchester United, telur að það verði bónus ef Nemanja Vidic geti spilað með liðinu gegn Chelsea um helgina.

Hann gat ekki leikið með United gegn Barcelona í kvöld vegna magakveisu.

„Ég held að hann sé ansi tæpur. En við munum gera okkar besta. Vonandi getur hann spilað á laugardaginn," sagði Ferguson sem sagði að Vidic sjálfur vildi ólmur spila.

Hann vonaðist til að sínir menn setji meiri pressu á Chelsea heldur en þeir gerðu á Barcelona í kvöld.

„Þetta verður öðruvísi leikur að sjálfsögðu. Engu að síður þurfum við að takast á við leikstíl Chelsea."