Kona á hægum batavegi eftir meinta árás eiginmanns

Lögregla hefur ekki enn getað tekið skýrslu af konu sem lögð var inn á sjúkrahús í byrjun september en grunur leikur á að eiginmaður hennar hafi gengið í skrokk á henni á heimili þeirra.

Konan er á hægum batavegi. Samkvæmt heimildum Vísis mun tíminn einn leiða í ljós hvort konan muni ná sér og geta gefið skýrslu um málsatvik.

Árásin mun hafa átt sér stað fyrir 25 dögum á heimili hjónanna í Breiðholti 1. september. Í kjölfarið leitaði konan á náðir vina og gisti hjá þeim. Samkvæmt upplýsingum Vísis missti konan meðvitund daginn eftir og var hún þá flutt á spítala. Var hún hætt komin vegna blæðingar inn á heila og gekkst undir bráðaaðgerð. Maðurinn var í framhaldinu úrskurðaður í gæsluvarðhald sem rann út 10. september.

Löng saga um ofbeldi einkennir sambúð hjónanna sem eru á sextugsaldri. Samkvæmt heimildum Vísis hefur maðurinn ekki áður verið kærður fyrir heimilisofbeldi en lögreglan hefur áður verið kölluð að heimili hjónanna vegna heimiliserja.