Hughes varar við væntingum

Mark Hughes, knattspyrnustjóri Manchester City, segir að stuðningsmenn félagsins eigi ekki að búast við því að fjöldi stórstjarna muni ganga til liðs við félagið næst þegar félagaskiptaglugginn opnar, í janúar næstkomandi.

Nýir eigendur félagsins, Abu Dhabi United Group, hafa ekki verið sparir á yfirlýsingar og ætla að eyða miklum fjármunum til að fá góða leikmenn til félagsins.

„Vandamálið er hins vegar það að þau félög sem eru með þessa leikmenn á samningi munu ekki sleppa þeim svo glatt. Kannski að þetta verði erfiðara en fólk gerir sér grein fyrir í janúar. Við munum reyna að fá leikmenn sem við eigum raunhæfan möguleika á að fá," sagði McCartney.

City eyddi um 60 milljónum punda í sumar í leikmennina Robinho, Shaun-Wright Phillips, Jo, Tal Ben-Haim, Vincent Kompany og Pablo Zabaleta.

Nýir eigendur eru svo sagðir hafa hug á því að ná í leikmann eins og Fernando Torres hjá Liverpool, Cesc Fabregas hjá Arsenal og Cristiano Ronaldo hjá Manchester United.

„Það eru margir mjög góðir leikmenn sem við myndum vilja fá til félagsins ef það stæði okkur til boða. Þetta eru leikmenn sem eru með félögum sem leika í Meistaradeildinni. Félögin vilja sjálfsagt ekki missa þá leikmenn á miðju tímabili í Meistaradeildinni," sagði Hughes.

Hann sagðist þó ekki finna fyrir aukinni pressu í starfinu.

„Álagið fylgir starfinu. Ég hef unnið sem leikmaður og þjálfari í 25 ár. Ef maður getur ekki unnið með álaginu á maður ekki heima í þessum bransa."