Pardew ánægður með ráðningu Zola

Alan Pardew, fyrrum knattspyrnustjóri West Ham, er ánægður með ráðningu félagsins á Gianfranco Zola.

West Ham hefur boðað til blaðamannafundar núna klukkan 15.30 þar sem Zola verður formlega kynntur til sögunnar sem nýr knattspyrnustjóri liðsins.

„Zola er ungur knattspyrnustjóri og átti frábæran feril sem leikmaður," sagði Pardew. „Vonandi tekst honum að taka það með sér í nýja starfið hjá frábæru félagi. Þeir munu taka honum opnum örmum og ég óska honum góðs gengis."

„Nú þurfa þeir að komast að niðurstöðu um hvaða árangri félagið vill ná og þetta er vissulega ný byrjun. Ég á enn góðar minningar frá mínum tíma þar og óska þeim alls hins besta."