Shearer gagnrýnir stjórnunarstíl hjá forráðamönnum Newcastle

Það verður að teljast ólíklegt að Alan Shearer verði ráðinn næsti knattspyrnustjóri Newcastle eftir að hann gagnrýndi forráðamenn Newcastle fyrir stjórnunarstíl sinn hjá félaginu. Shearer sagði hann skrýtinn.

„Ég vildi gjarnan taka við starfi knattspyrnustjóra einhvern tímann á mínum ferli," sagði Shearer. „En ég vil fá að stýra og ráða því hverjir koma til félagsins og hverjir fara."

Kevin Keegan hætti hjá Newcastle þar sem hann fékk ekki að ráða leikmannamálum félagsins hvað varðar kaup og sölu.

Þeir sem hafa verið helst orðaðir við starfið eru til að mynda David Moyes hjá Everton og Didier Deschamps, fyrrum stjóri Juventus. Þó er talið líklegast að Dennis Wise, sem er þegar á mála hjá félaginu, taki við starfinu í samstarfi við Gus Poyet, fyrrum félaga sinn hjá Chelsea.