Savage þykir slá óþarflega um sig

Miðjumaðurinn Robbie Savage olli ólgu í herbúðum Derby County í vikunni þegar hann mætti á æfingu á nýjum Lamborghini sportbíl. Ónefndur maður tengdur liðinu lýsti því yfir í fjölmiðlum að svona stjörnustælar væru lýsandi fyrir vandræði liðsins, sem hefur ekki unnið deildarleik í næstum eitt ár.

Derby féll úr úrvalsdeildinni með skömm á síðustu leiktíð og er enn án sigurs í B-deildinni það sem af er þessari leiktíð. Liðið situr á botninum með eitt stig eftir fjórar umferðir.

Robbie Savage vakti litla lukku þegar hann mætti á nýjum (en þó notuðum) Lamborghini á æfingu í vikunni.

"Þetta er hneyksli. Leikmaður sem er ekki einu sinni í hópnum mætir á æfingu á bíl eins og þessum. Öllum er skítsama og liðið getur ekki keypt sigur í deildinni," var haft eftir ónefndum manni úr herbúðum liðsins.

Savage olli viðlíka hneykslan í fyrra þegar hann mætti á lúxusbíl frá Mercedes þegar hann hélt upp á félagaskiptin frá Blackburn.

Savage sjálfur skilur ekki lætin á bak við bílakaup sín. "Ég sé ekki að það skipti máli hvernig bíl ég ek. Ég legg mig fram á æfingum og er að reyna að komast aftur inn í liðið," sagði Walesverjinn.