Í morgun klukkan 7:45 hlupu tveir menn inn á flugbrautina við Flugstöð Leifs Eiríkssonar. Þeir voru handteknir og eru nú í fangeklefa hjá lögreglunni á Suðurnesjum. Brotin eru litin mjög alvarlegum augum og geta varðað fangelsi allt að sex árum.

Stefán Thordersen flugvallarstjóri staðfesti í samtali við Vísi að tveir menn hefðu hlaupið inn á flugverndarsvæðið þar sem þeir voru síðan handteknir.

Samkvæmt heimildum Vísis voru mennirnir að mótmæla brottför Keníamannsins Paul Ramses, sem fluttur var til Ítalíu í morgun. Mál hans hefur verið nokkuð í umræðunni undanfarið en hann sótti um pólitískt hæli. Paul var ofsóttur í heimalandi sínu og sótti því um hæli. íslensk stjórnvöld ákváðu hinsvegar að vísa honum úr landi án þess að taka umsókn hans til meðferðar.

Eyjólfur Kristjánsson, fulltrúi lögreglustjórans á suðurnesjum, sagði í samtali við Vísi að öryggisverðir flugvallarstjóra hefðu óskað eftir aðstoð við handtöku mannanna í morgun. Þeir hefðu verið handteknir og settir í fangaklefa. „Þeir verða yfirheyrðir á eftir. Svona mál eru litin mjög alvarlegum augum og geta valdið stór hættu," segir Eyjólfur. Athæfi sem þetta getur varðað fangelsi allt að sex árum samkvæmt heimildum Vísis.