Við söknuðum Agger mikið

Rafa Benitez segir að meiðsli Daniel Agger hafi verið Liverpool dýr í vetur og segir þau eina af ástæðunum fyrir því að lið hans náði ekki lengra í deildinni en raun bar vitni.

Hann segir líka að það hafi verið liði sínu áfall að ná ekki að næla sér í argentínska varnarmanninn Gabriel Heinze.

"Það hefði verið betra að vera með Henze í vörninni. Við fengum of mörg mörk á okkur úr föstum leikatriðum og misstum leiki sem við áttum að vinna niður í jafntefli. Miðverðir okkar voru að spila of marga leiki og við söknuðum Daniel Agger mikið," sagði Benitez í samtali við LFC TV.

Benitez segir mörkin sem Liverpool fékk á sig eftir föst leikatriði hafa verið sérstaklega dýr.

"Á síðustu leiktíð fengum við á okkur sex mörk eftir föst leikatriði, en í ár voru þau sextán. Þetta er atriði sem við verðum að laga og þó vörn okkar hafi verið sterk undanfarin ár, verðum við að bæta okkur," sagði Spánverjinn.