Margir missa vinnuna um næstu mánaðamót

Margir þeirra iðnaðarmanna sem hafa fengið uppsagnarbréf munu missa vinnuna um næstu mánaðamót, segir Þorbjörn Guðmundsson, framkvæmdastjóri Samiðnar. Hann bendir á að flestir þeirra sem hafi verið sagt upp vinnu hafi haft uppsagnafrest sem renni út þá og svo muni fólk missa störf allt fram til mánaðamóta janúar/febrúar.

Þorbjörn segir að ekki hafi verið skráð hversu margir félagsmenn í Samiðn hafi misst vinnu en hann segir að sig gruni að hlutfall sé lægra á meðal faglærðra heldur en ófaglærðra. Þá sé jafnframt ljóst að margir erlendir starfsmenn hafi horfið á braut og það hafi skapað svigrúm fyrir Íslendinga.

Samiðn greindi frá því í morgun að norska ráðningafyritækið Jobbia hafi haft samband við sambandið með það fyrir augum að bjóða Íslendingum störf í Noregi. Fram kemur á vef Samiðnar að fulltrúar frá ráðningarfyrirtækinu komi því hingað til lands og muni halda kynningarfund í húsnæði Samiðnar að Borgartúni á fimmtudaginn. Þorbjörn segir að hingað til hafi Norðmenn verið tregir á að gefa vonir um að þar í landi geti fengist vinna fyrir mikinn fjölda en fróðlegt yrði að sjá hvað fundurinn á fimmtudag myndi leiða í ljós.