Ósáttir iðnaðarmenn rífa niður verðmæti úr björgunarmiðstöð

Nokkuð hefur gustað í kringum opnun á nýrri björgunarmiðstöð á Selfossi sem upphaflega átti að opna 17. júní í sumar. Framkvæmdir stöðvuðust í kjölfar þess að verktakar fengu ekki greitt en fljótlega var ákveðið að halda áfram og samningar voru gerðir við bankann.

Nú hefur hins vegar komið í ljós að þeir samningar ganga ekki eftir. Verktakar mættu í morgun og byrjuðu að hirða verðmæti úr húsinu. Ljós voru skrúfuð niður og miðstöðin hefur verið fjarlægð úr húsinu.

„Já að mörgu leyti skil ég þá. Þeir fá ekki borgað og reyna því að bjarga því sem þeir telja vera sín verðmæti," segir Ingvar Guðmundsson, formaður Björgunarfélags Árborgar.

Björgunarfélagið, Heilbrigðisstofnun Suðurlands með sjúkraflutninga sína og Brunavarnir Árnessýslu með slökkviliðið á Selfossi var ætlað pláss í nýja húsinu.

„Þetta átti að vera klárt í sumar en stoppaði. Með heljarmiklu átaki voru síðan gerðir samningar við bankann um hvað þetta mætti kosta, og stóð bankinn á bak við það. Svo þegar átti að fara gera upp það sem á milli stóð treysti bankinn sér ekki í skuldbindingar sínar, því gátum við ekki klárað að gera upp við verktakana," segir Ingvar.

Um 2/3 hluti hússins er þegar tilbúinn að undanskildum steypta hluta hússins sem enn á eftir að klæða.

„Nú er hins vegar búið að skrúfa niður ljós og brunaviðvörunarkerfið. Mér sýndist líka að stór hluti miðstöðvarinnar sé horfinn. Það verður því ekkert hægt að flytja þarna inn."

Ingvar segir að unnið hafi verið að lausn á málinu síðustu daga og meðal annars hafi verið rætt um yfirtöku Brunavarna Árnessýslu á húsinu þar sem opinberir aðilar hafi m.a aðgang að ódýrari lánsfé.

„Fundur með þessum aðilum var haldinn í gærkvöldi og þar fór eitthvað á milli manna sem gerði það að verkum að verktakar mættu þarna klukkan átta í morgun og byrjuðu að skrúfa niður," segir Ingvar að lokum.