Draumur rættist hjá Redknapp

Harry Redknapp, stjóri Portsmouth, var vitanlega hæstánægður með sigur sinna manna í ensku bikarkeppninni í dag og tileinkaði sigurinn fjölskyldu sinni.

Nwaknwo Kanu skoraði eina mark leiksins í fyrri hálfleik en Hermann Hreiðarsson og félagar í vörninni hjá Portsmouth stóðu vaktina í vörninni mjög vel. Hermann lék allan leikinn.

„Þetta er frábær tilfinning og rættist draumur minn í dag," sagði Redknapp eftir leikinn. Hann hafði aldrei áður komist í úrslitaleik ensku bikarkeppninnar á 40 ára ferli, hvorki sem leikmaður eða knattspyrnustjóri.

„Ég er fjölskyldumaður og þetta var allt gert fyrir fjölskylduna. Ég er bara svo ánægður fyrir þeirra hönd og fyrir allra hönd."

Hann viðurkenndi þó að það hefði tekið á taugarnar að vera bara með eins marks forystu.

„Þeir héldu áfram að ógna og er full ástæða til að hrósa liði Cardiff," sagði hann og var einnig ánægður fyrir hönd markaskorarans Kanu. „Hann fékk frábært tækifæri til að skora skömmu áður en markið kom. Hann skoraði líka í undanúrslitunum og kom svo aftur í dag og skoraði. Ég er mjög ánægður fyrir hans hönd."

Portsmouth tryggði sér með sigurinn þátttökurétt í UEFA-bikarkeppninni og sagðist Redknapp hlakka mikið til að taka þátt í henni.