Modric samdi til sex ára

Tottenham hefur staðfest að félagið hefur samið við króatíska landsliðsmanninn Luka Modric til næstu sex ára.

Tottenham greiðir 21 milljón evra á næstu fjórum árum fyrir Modric, um 2,4 milljarða króna. Þetta er þó allt háð því að Modric fái atvinnuleyfi í Englandi en það ætti ekki að vera mikið vandamál þar sem hann hefur verið fastamaður í króatíska landsliðinu undanfarið þrátt fyrir ungan aldur. Hann leikur nú með Dinamo Zagreb í heimalandinu og kemur til Tottenham í sumar.

„Það verður mér mikið ánægjuefni að spila í ensku úrvalsdeildinni," sagði Modric. „Þetta er besta deildin í Evrópu enda þrjú ensk lið í undanúrslitum Meistaradeildar Evrópu."

Landsliðsþjálfari Króatíu, Slavan Bilic, efast heldur ekki um að Modric muni slá í gegn í ensku úrvalsdeildinni með Tottenham.

Juande Ramos hefur boðið Modric velkominn til White Hart Lane en viðurkenndi um leið að Dimitar Berbatov gæti verið á leið frá félaginu.