Hermann: Þvílíkur léttir

Hermann Hreiðarsson sagði eftir sigur sinna manna í Portsmouth í ensku bikarkeppninni í dag að löng bið væri loksins á enda.

„Þetta er búið að taka sinn tíma," sagði Hermann í samtali við Skysports en þetta var hans fyrsti stóri titill á Englandi eftir rúmlega áratugsferil á Englandi. Hermann lék fyrst með Crystal Palace í ensku úrvalsdeildinni árið 1997 en hefur síðan leikið með fimm félögum til viðbótar í öllum fjórum atvinnumannadeildunum þar í landi.

„Við höfum beðið eftir þessum leik talsvert lengi," bætti hann við. „Við álitum okkar möguleika ágæta en það er gríðarlega mikill léttir að hafa unnið bikarinn."

„Cardiff spilaði vel en við náðum að skapa nokkur færi og komast í 1-0 forystu," sagði hann um leikinn.

Hann sagði einnig að árangurinn í dag markaði hápunkt ferils síns sem knattspyrnumaður. „Þetta er minn langbesti árangur. Þetta er alveg stórkostlegt."