Pálmi Rafn: Líður aðeins betur en eftir síðasta leik

„Jú, ég get ekki neitað því að mér líður aðeins betur nú en eftir síðasta leik," sagði markaskorarinn Pálmi Rafn Pálmason sem skoraði öll þrjú mörk Vals gegn Grindavík í kvöld.

Valur tapaði stórt í fyrstu umferð Landsbankadeildarinnar, 5-3 fyrir Keflavík, og svaraði fyrir sig í kvöld með góðum 3-0 sigri á Grindavík.

„Okkur gekk vel að gíra okkur upp í þennan leik," sagði Pálmi Rafn í samtali við Vísi eftir leik. „Við vorum staðráðnir í að sýna okkar rétta andlit. Leikurinn í Keflavík var alls ekki nógu góður af okkar hálfu og því ekkert annað að gera en að svara því í kvöld. Við vorum ekkert bangnir fyrir þennan leik enda ákváðum við að dvelja ekkert lengur við leikinn í Keflavík."

Bæði lið voru lengi að þreifa fyrir sér í fyrri hálfleik og segir Pálmi Rafn að það hafi verið eðlilegt. „Þetta var barátta tveggja góðra liða hér í kvöld. Grindavík er með mjög öflugt lið og má alls ekki vanmeta þá."

Hann skoraði sína fyrstu þrennu í efstu deild í kvöld en hafði áður afrekað það í 1. deildinni. „Það er auðvitað mjög gaman að ná þrennunni líka í efstu deild og ætli landsliðið sé ekki bara næst," sagði hann í léttum dúr. „En mér líður mjög vel með Valsliðinu og þegar við látum boltann ganga vel eins og við gerðum á köflum í kvöld mun okkur vegna vel."