Skilur gremju fólks - Sjálfstæðisflokkurinn minni en VG

Geir H. Haarde, forsætisráðherra og formaður Sjálfstæðisflokksins, segist skilja gremju almennings.

,,Ég finn auðvitað fyrir því eins og aðrir hvað það eru miklar áhyggjur í þjóðfélaginu og hvernig þetta ástand leikur fólk og fyrirtæki og samfélagið allt. Ég hef meiri áhyggjur að bregðast við þeim vanda, " sagði Geir í seinnifréttum Ríkissjónvarpsins í kvöld.

Í nýjum þjóðarpúlsi Gallups mælist stuðningur við Vinstri græna meiri en Sjálfstæðisflokksins sem er orðin þriðji stærsti stjórnmálaflokkur landsins. Samfylkingin nýtur mest stuðnings og segjast 31% myndu kjósa flokkinn. 27% segjast myndu kjósa Vinstri græna en 26% segjast myndu kjósa Sjálfstæðisflokkinn. Stuðningur við Framsóknarflokkinn mælist 10% og þá nýtur Frjálslyndi flokkurinn 3% stuðnings.

,,Maður getur alveg skilið það að gremja fólks bitni á forystuflokknum í ríkisstjórninni og með sama hætti aukist fylgi hjá stærsta stjórnarandstöðuflokknum," sagði Geir.