Liverpool er í hefndarhug

Miðjumaðurinn Tom Huddlestone hjá Tottenham gerir fastlega ráð fyrir að Liverpool verði í miklum hefndarhug í kvöld þegar það sækir Tottenham heim í enska deildabikarnum.

Tottenham lagði Liverpool 2-1 í skrautlegum leik fyrir skömmu síðan þar sem gestirnir réðu ferðinni lengst af en töpuðu þegar þeir fengu á sig tvö mörk í blálokin.

"Liverpool hafði ekki tapað þegar það kom hingað um daginn og vill örugglega hefna fyrir ófarirnar. Við verðum að eiga góðan leik. Bæði lið eiga sér góða sögu í bikarkeppnum svo þetta verður eflaust hörkuleikur. Kvöldleikirnir á White Hart Lane eru alltaf magnaðir og við vonum að við getum náð svipuðum úrslitum og í deildinni," sagði Huddlestone.

Hann langar mikið að upplifa stemminguna sem var á liðinu á síðustu leiktíð þegar það vann deildabikarinn eftir sigur á Chelsea í úrslitaleik.

"Það var frábær reynsla að komast í úrslitin og lyfta bikarnum á Wembley og okkur hungrar í að endurtaka það. Við erum með ungt lið en allir leikmennirnir vita að það er sérstakt að vinna bikara."