Ferguson: Real talar við leikmenn okkar daglega

Sir Alex Ferguson fór þess á leit við blaðamenn í dag að þeir einbeittu sér að leik Villarreal og Manchester United í Meistaradeildinni. Nokkrir blaðamenn höfðu þó meiri áhuga á að vita af meintum áhuga Real Madrid á framherjanum Carlos Tevez.

Nokkurð hefur verið ritað um að Tevez sé efstur á óskalista Real nú í janúar eftir að fyrrum United maðurinn Ruud van Nistelrooy þurfti að gangast undir uppskurð og verður ekki meira með á leiktíðinni.

Tevez er reyndar enn ekki formlega orðinn leikmaður Manchester United, en fjölmiðlar á Englandi hafa gert því skóna að hann gæti óskað þess að fara annað vegna þess hve lítið hann hefur fengið að spila.

"Ég hef ekki talað við Carlos í tengslum við Real Madrid. Ég gæti reyndar svarað fyrirspurnum Real á hverjum degi allt tímabilið, því þeir hætta ekki að tala við leikmenn okkar. Það verður nægur tími til að tala um Real Madrid síðar á þessu tímabili - en núna vil ég einbeita mér að Villarreal," sagði Alex Ferguson.