Maradona: Ég er ekki óreyndur

Diego Maradona segir það hlægilegt að hann sé ekki nægilega reyndur til að taka að sér starf landsliðsþjálfara Argentínu.

Búist er við því að Maradona verði formlega ráðinn í starfið á næstu dögum. Hann er einn allra þekktasti knattspyrnumaður heimsins en hann hefur lítið starfað sem þjálfari. Hann starfaði tvívegis sem þjálfari fyrir rúmum áratug síðan og stýrði alls 23 leikjum.

„Það hefur mikið verið rætt um reynslu en ég á að baki 20 ár með argentínska landsliðinu," sagði Maradona. „Það er því hlægilegt að halda því fram að ég sé óreyndur."

„Knattspyrnan hefur ekki breyst. Ég held að það sé ekkert sem geti komið mér á óvart."