Kirkjuþing segir hreinskilna umræðu mikilvæga

Kirkjuþing kom saman í dag og varlokið afgreiðslu allra þeirra mála er fyrir þinginu lágu nema fjórða máls, frumvarp um endurskoðun á þjóðkirkjulögum. Verður aflað umsagna um frumvarpið innan kirkjunnar og það tekið fyrir að nýju á fundi Kirkjuþings þann 28. nóvember næstkomandi.

Meðal þess sem samþykkt var á þinginu var ályktun vegna þeirra efnahagsþrenginga sem blasa við Íslendingum. ,,Þegar frá líður munu fást skýringar á þeirri atburðarás sem leiddi til þess ástands sem nú ríkir. Mikilvægt er að hreinskilin umræða fari fram en einnig að tími sannleikans verði tími sáttargjörðar í íslensku samfélagi," segir í ályktuninni.

Í ályktuninni eru söfnuðir Þjóðkirkjunnar eru hvattir leita nýrra leiða og vera vakandi fyrir þeim sem þurfa aðstoðar við. Söfnuðir eru meðal annars hvattir til að veita aðstöðu í kirkjum og safnaðarheimilum endurgjaldslaust fyrir starf sem miðar að því að styðja og styrkja fólkið í samfélaginu við þessar aðstæður.

Kirkjuþing hvetur einnig stjórnvöld og sveitarfélög til að láta skólastarf og forvarnavarstarf njóta forgangs þegar skera þarf niður. Einnig er bent á að margir þeirra sem nú glíma við alvarlegan fjárhagsvanda fá ekki aðstoð samkvæmt núverandi viðmiðunarreglum. Kirkjuþing hvetur ríkisstjórn og sveitarfélög til að gefa sérstakan gaum að því.